🌿 TORBEO, UNHA PARROQUIA CHEA DE INICIATIVA
Información e imágenes de la pagina de Facebook del Concello https://www.facebook.com/share/1Be9cXZwZx/
Os días previos ás Festas de Verán de Torbeo 2026 volveron demostrar que Torbeo é unha parroquia dinámica, cunha enorme capacidade para organizarse e crear actividades. Persoas a título individual, grupos de veciños e veciñas e a Asociación Veciñal de Torbeo (AVETO) fixeron da semana anterior ás festas unha sucesión de propostas pensadas para todas as idades.
🎬 Houbo tempo para o cine infantil e xuvenil na vella escola de Torbeo, para os documentais e tamén para a presentación oficial do programa das festas.
🐄 E descubriron que o leite non sae dos bricks...
Unha das experiencias máis especiais foi un obradoiro de muxido, pensado especialmente para os máis novos. Moitos deles viven durante o ano en diferentes cidades de España ou mesmo no estranxeiro e nunca tiveran a oportunidade de achegarse a esta tarefa tradicional.
Por primeira vez, puideron muxir coas súas propias mans e descubrir dunha maneira divertida e directa de onde vén o leite que consumimos cada día. Un pequeno contacto coa vida rural e cos saberes que forman parte da historia de Torbeo.
🧩 O reto: descubrir a palabra secreta
Outra das actividades que máis interese espertou foi un xogo de pistas organizado pola propia veciñanza, coordinada polo creador da idea, Antonio Paz.
Veciños e veciñas caracterizados como peregrinos mendigos, panadeiros ou meseiros convertéronse en personaxes dunha aventura que percorreu lugares emblemáticos da parroquia: a cantina, a escola, a igrexa ou o vello forno, entre outros.
O reto era ir resolvendo as probas ata descubrir unha palabra secreta que non podía ser outra: TORBEO.
🏆 O equipo Pili e Mili foi o primeiro en completar o percorrido, cun tempo de 36 minutos.
📚 Para os participantes máis novos, o Concello de Ribas de Sil colaborou obsequiándoos con exemplares de O Principiño, a coñecida obra de Antoine de Saint-Exupéry, na súa edición en galego.
🌍 Torbeo, centro de gravidade en agosto
Durante estes días volveu quedar patente algo que se repite cada verán: Torbeo convértese en agosto nun verdadeiro centro de gravidade, un lugar ao que regresan familias e persoas que viven durante o ano en puntos moi diferentes.
No xogo de pistas escoitábase falar catalán, francés, castelán con acento manchego ou madrileño... e sempre, sempre, galego. 💚 Unha mestura de xeracións, procedencias e linguas arredor dun mesmo lugar e dun sentimento compartido: Torbeo.
Parabéns a todas as persoas que dedicaron o seu tempo e a súa ilusión a organizar estas actividades e a manter viva a parroquia.
#Torbeo #AVETO #RibasDeSil #ConcelloDeRibasDeSil #CulturaEnRibasDeSil #FestasDeTorbeo #FestasDeVerán2026 #Cultura #ParticipaciónVeciñal #VidaRural #Tradicións #OPrincipiño #Galicia #RibeiraSacra #XeoparqueMontañasDoCourel
